Mae Canolfan Dreftadaeth y Byd Blaenafon yn tystio i lafur caled glowyr a gweithwyr haearn y gorffennol. Cewch weld arwyddion o weithfeydd haearn a glo Cymru ar draws y safle 33 cilomedr sgwâr hwn. Gan hynny, rydych yn siŵr o gael diwrnod allan gwerth chweil yma oherwydd yr atyniadau, y digwyddiadau a'r gweithgareddau sydd ar gael. Ymhlith y prif atyniadau mae Amgueddfa Lofaol Cymru Big Pit, Gweithfeydd Haearn Blaenafon, Canolfan Dreftadaeth y Byd a Rheilffordd Dreftadaeth Blaenafon. Mae'r Porth Darganfod yn rhoi gwir flas ichi ar hanes Cymoedd y De, a hynny mewn amgylchfyd y mae cerddwyr, beicwyr a theuluoedd fel ei gilydd yn heidio yma i'w fwynhau.

Mae Coedwig Cwmcarn yn encil bach hyfryd sy'n agos at garreg eich drws, ond gallwch daeru eich bod filltiroedd ymhell o bobman pan ddowch chi yma! Mae gan Goedwig Cwmcarn enw am fod yn baradwys i feicwyr mynydd brwd oherwydd y llwybrau niferus, y cyfleusterau parcio gwych a'r siop atgyweirio beiciau sydd ar y safle! Os yw'n well gennych gerdded, cewch fwynhau digon o lwybrau sy'n amrywio o deithiau cerdded hamddenol i anturiaethau hirach ar ddwy droed. I'r rhai sy'n chwilio am hwyl, gallwch gymryd rhan mewn gweithgareddau dŵr ac mae maes chwarae antur yma hefyd i'r chwilotwyr iau. Gallwch fwynhau brecwast, byrbrydau a phrydau bwyd blasus yng Nghaffi'r Gigfran, a gallwch hyd yn oed aros dros nos yn un o'r unedau glampio neu'r cabanau sy'n cynnig golygfeydd godidog.

Mae digon o berlau cudd i'w darganfod ym Mharc Penallta. Cerddwch drwy'r twnnel helygen, gwyliwch acrobateg aer gwas y neidr dros y pwll neu ewch i ddarganfod y Cawr Cwsg. Cofiwch roi tro am Swltan, y Ferlen Pwll Glo, sy'n un o nodweddion eiconig y parc ac yn un o gloddweithiau ffigurol mwyaf y wlad. Mae milltiroedd o lwybrau i'w dilyn yma, ac maen nhw'n amrywio mewn hyd. Dechreuwch o'r prif faes parcio a mwynhewch eich anturiaeth!

Castell Caerffili yw castell mwyaf Cymru ac, yn hyn o beth, mae'n dra enwog. Gall haneswyr ifanc fwynhau diwrnod perffaith yma, ac mae'r castell wedi'i drwytho mewn hanes. Dewch i darganfod y tyrau, y ddrysfa, ffau'r ddraig a'r Neuadd Fawr. Codwyd Castell Caerffili ym 1271, ac mae wedi goroesi ymosodiadau lu gan y Cymry, ond mae un ymosodiad wedi gadael craith go nodedig; sef y tŵr sy'n gwyro, a achoswyd gan Bengryniaid Oliver Cromwell ym 1648. Rydych yn siŵr o sylwi arno am ei fod ar ogwydd o 3 metr!

Mae Parc Gwledig Cwm Dâr yn lle perffaith i deuluoedd. Mae'r parc yn rhychwantu dros 500 o erwau, a cheir yma lwybrau cerdded sydd wedi'u hamgylchynu gan goetiroedd, porfeydd a gweundir; ac mae'r lle yn gartref i gyfoeth o fywyd gwyllt a byd natur. Ymhlith y gweithgareddau sydd ar gael yma mae ymdrochi mewn nentydd, teithiau cerdded tywys a digwyddiadau drwy gydol y flwyddyn i bawb eu mwynhau. Os ydych yn chwilio am antur, gallwch fwynhau gêm saethu laser, canŵio, caiacio a mynd ar gefn beic mynydd ar hyd y gwahanol lwybrau beicio sy'n addas i bobl o bob gallu. Codwch rywbeth cyflym i'w fwyta yng nghaffi'r Black Rock a holwch ynglŷn â'r safle gwersylla a charafanio os ydych am wneud noson neu ddwy ohoni.

Mae Parc Gwledig Llyn Llech Owain yn rhychwantu 180 o erwau ac mae golygfeydd godidog i’w mwynhau yma. Mae hanes y lle yn dyddio i ddiwedd y bedwaredd ganrif ar ddeg. Mae'r Porth Darganfod hwn yn arbennig o bwysig i ymwelwyr oherwydd y llyn. Gofalai milwr hanesyddol, Owain Lawgoch, dros y ffynnon ar y Mynydd Mawr. Bob dydd, deuai Owain i'r ffynnon i godi dŵr iddo ef ei hun ac i'w geffyl. Ar ôl iddo orffen, rhoddai'r llechfaen yn ôl dros geg y ffynnon a ddaliai'r dŵr yn ôl. Serch hynny, anghofiodd wneud hynny un tro a pharhaodd y dŵr i lifo o'r ffynnon. O ganlyniad i hyn, crëwyd y llyn. Ers hynny, mae Parc Gwledig Llyn Llech Owain yn dwyn enw Owain oherwydd yr hyn a wnaeth. Mae'r gair 'Llech' yn cyfeirio at y llechfaen a ddaliai'r dŵr yn ôl. Yn ogystal â'r llyn enwog, mae gan y Porth Darganfod hwn rwydwaith o lwybrau cerdded, llwybrau beicio a llwybrau ceffylau i bobl eu mwynhau, ynghyd â chanolfan ymwelwyr wrth ymyl y llyn a digonedd o gynefinoedd bywyd gwyllt.